„Dr Geisser am Oberblegisee“

Uf Oberblegi isch e See. Wo ds Wasser ine chunnt, gsiit me, aber wo ases uselauft, het me erscht gmerggt, wo dr Leuggelbacher Geisser gmeint het, er mües chrüüzwys drüberübere schwimme. Dr Puur i dr Hütte het ems gweert:

„Bis ke Narr, mä törf Gott nüd versueche, staat i dr Gschrift.“ Aber dr Geisser git umme: „Sigs etz em Herrgott lieb oder leid, so wil ich übere!“

Dr Puur tänggt: „Nu sine?“ und lueget em zue, wen er schwimmt. Schier wäär er dänne gsii, da ninnts ne uf eimaal abe. Und de selb Stund holt sini Muetter im Leuggelbach Wasser. Was meined er, as ere i d Gelte ggumpet isch? Dr Chopf vu irem Bueb, wo übere See het welle schwimme.